拜山有五百蚊攞，恨死唔係姓鄧嘅人或者非元朗鄧姓子孫。昔日在鄉下拜山，男丁可以分一嚿豬肉，已經好開心矣。
左丁山去拜山，不特五百蚊冇得攞，分分鐘破財五千，喊都無謂。清明節日，一早上山，除香燭元寶外，一定帶埋先父生前刨馬嘅《老五馬經》、《幸運馬經》，一併在寶爐燒畀佢；左丁山唔多識讀書之時，老竇已經教我睇呢兩份馬經，每年拜山兩次，例必帶埋去燒。
在骨灰寶塔前擺好陣式之際，忽聞後面有女人聲破口大罵：「啲人咁冇公德心，元寶溪錢亂咁擺，冇啲環保……」回頭一望，乃一位中年瘦削尼姑，另一位年老師傅就話：「大風吹散晒啫，唔好勞氣。」瘦尼姑一邊掃除，一邊嚕嚕囌囌，老尼姑就只做不說，猛咁執垃圾，顯見一位心靜，一位凡心未了。
本來兩不相干，但左丁山要燒元寶，再燒馬經嗰陣，瘦尼姑喝住：「寶爐只應燒元寶，世俗嘢燒嚟做乜，先人上咗去另一世界，唔要呢類嘢。俾佢咁窒法，惟有唔燒，唔通拜山搵交嗌，同師姑過唔去咁冇修養咩。
返到屋企，條氣仍然唔順，到停車場攞車出去飲茶。點知一開車，一架寶馬就響右手前方停低；中年女人落車，示意我唔好揩到佢，掛住望佢，左邊車頭竟然撞花一架平治bumper，自己架錢七左邊車身更加凹咗㖭，睇怕呢次賠錢整車，傷荷包到極。以後俾師姑窒親，都應該返屋企唔好再出街。