台灣四人組合F4咁鬼紅，最近連內地一啲演唱會主辦商都想傾佢哋上去做騷，但對方開三十二萬美金一場（約二百四十九萬六千港幣），卒之嚇到個主辦商走都走唔切。
不過，馮仁昭有個朋友接觸過佢哋，知道佢哋一啲得意嘢，好似吳建豪講嘢時就最多動作，對手不停咁郁，好似黑人咁。
而朱孝天就好鍾意岳高個頭望人；至於好多人迷上嘅言承旭，原來佢剃鬼晒啲腋毛，個胳肋底好鬼乾淨㗎！坊間更有傳聞話言承旭唔鍾意女仔㗎，不過佢就喺台灣否認咗。
而馮仁昭早排去唱K，同場班女仔都爭住唱F4啲歌，不過馮仁昭睇F4啲卡拉OK嘅MV，幾首歌用嚟用去都係嗰啲畫面，再加一啲F4成員嘅硬照，都幾鬼慳水慳力。
二人組合Shine噚日去商台接受《靈幻搜奇》節目訪問，兩人大談撞鬼遭遇，成員黃又南（右）就自爆話：「我試過拍陳果嘅戲，佢要我睇住啲布景，點知我瞓着覺，突然俾陣寒風嚇醒咗，我一直都相信呢啲嘢㗎。」
而徐天佑就踢爆黃又南喺日本時，成日打電話急召佢嚟陪自己，哈！睇唔出佢咁細膽噃！
古天樂同楊千嬅噚日去咗新城電台接受《家天下》嘅錄音訪問，古仔話近排記性唔好，已經睇咗醫生，醫生叫佢要多啲休息減壓。佢話：「好似我噚晚（即前晚）先同經理人食完飯，但都唔記得咗，醫生話有兩個可能，一係以前車禍傷過腦皮層，或者係工作太忙太大壓力。」
馮仁昭知道今日梁詠琪（GiGi）同容祖兒將出現對撼場面，佢哋兩個今日各自為代言嘅護膚產品舉行記者會。既然兩位阿姐對撼，咁就梗係要出啲招數吸引傳媒。聽講GiGi嘅FANCL會以自助餐招呼傳媒，重加送二千蚊禮券畀嚟採訪嘅記者，而容祖兒嘅~H 2 O+就搵古天樂做嘉賓，同GiGi鬥過。
肥姐沈殿霞早前應邀到新加坡拍攝英語處境劇《肥肥一家親》，肥姐喺劇中飾演一位點心師傅，劇集喺當地收視高企，而齣劇就安排下個月喺明珠台播映。噚日肥姐聯同劇中男主角之一嘅張永權喺美麗華酒店出席宣傳活動，肥姐重即席示範包點心同煮魚蛋，肥姐話今次拍劇最大得益係學英文。
吳倩蓮嘅前度男友庹宗華，據聞將會同一個內地姑娘結婚，庹宗華今日重會同屋企人以及未婚妻影全家福。而庹宗華嘅未婚妻，係圈外人，喺內地有一份穩定工作，身形唔高，屬纖瘦型，臉形長長，談吐都幾大方。