曾志偉日前出席澳門打吡大賽時被指刻意迴避楊受成。前晚他出席仁濟活動時被問到是否與楊受成有心病，志偉暗示與對方從來不是好友。
曾志偉與「華人高爾夫球會」一班會員，包括吳啟華和苗僑偉等，前晚出席該會前主席陳耀星在灣仔君悅酒店舉行的仁濟醫院董事局總理就職慶典，祝賀陳耀星榮升仁濟主席。而曾志偉在回應迴避楊受成一事時，更暗示從未當過楊受成是好朋友。
日前澳門舉行打吡大賽，楊受成胞弟楊海成的馬匹「皇室寶」在打吡大賽中勝出。當眾人拉頭馬大合照時，楊受成與曾志偉罕有地一起出現，但就記者所見，志偉諸多迴避楊受成。前晚記者就此事向志偉了解，他卻否認說：「冇需要避，咁啱冇企埋一齊啫。」
曾： 曾志偉 記： 記者
記： 下次見到面會唔會打招呼？
曾： 有需要咪打，冇需要咪唔打囉，我自己心裏面冇嘢，唔會尷尬。
記： 同佢有冇心病？
曾： 邊個佢呀？
記： 楊（受成）生囉。
曾： 冇，冇心病，曾經好過就有心病啫！
志偉言下之意即他與楊受成由始至終不是好朋友，所以二人之間根本沒有心病可言。
其後曾志偉與吳啟華在宴會上表現情緒高漲，前者一度表演「吹喇叭」，把整支白酒一飲而盡。至於吳啟華亦飲至面紅耳熱，當他及後在台上獻唱一曲《燈火闌珊處》時，更有女士上台拉着他合照，可謂豔福無邊。
此外，前晚謝賢（四哥）在宴會上，大罵傳媒「仆街」（詳見另文），問志偉何以四哥表現如此失控時，志偉說：「抵死吖，你哋亂咁寫，後生仔梗有同人拍吓拖，咁對象唔啱分手，呢樣嘢就梗係會有，霆鋒一向唔鍾意交代自己私生活。如果霆鋒瞓覺瞓得唔好，講錯咗一句說話，又會俾人大做文章，所以唔講重好。」有指霆鋒一腳踏兩船，但志偉卻說：「或者佢從未搭過船，由頭至尾都係喺陸地呢！」
採訪：顏英儀、梁錦雯
攝影：陳慧安