美股前晚先跌後穩，杜指尾市跌幅大為收窄，納指更轉跌為升，由於港股前日先跌，所以昨日輕微反彈，但成交稀疏，市場觀望氣氛濃厚。
杜指及納指STC有轉好迹象，啟示短期或先出現反彈，若然屬實，對港股守穩10700有幫助，恒指今明若能重上50日線10852之上，後市可以睇番好啲。
喺美國施壓之下，以色列終於做樣退軍，但有沙龍做以色列總理一日，以巴衝突都好難平息，中東局勢唔明朗，始終對油價有利。
噚日石油股升勢放緩，中海油（883）更出現獲利回吐，倒跌2.6%收市，收9.35元。不過，只要油價長期保持於20美元之上，對中石油（857）及中海油未來業績十分有利。
可能係石油股升勢放緩，國企股噚日亦出現回吐。重慶鋼鐵（1053）升至1.19元已經腳軟，趙飛雲按原定計劃喺1.18元止賺。至於佑威（627）則走勢較為波動，早市試一試0.76元就開始回落，尾段沽壓較重，最低見過0.71元，尾市抽番上0.73元收市，微跌1仙。如果今日再試0.76元唔破，可以再沽一半套利。 趙飛雲