今日又有新股上市，經紀陳話呢隻做展覽嘅建發國際（223），由於貨疏同埋有大陸佬照住，所以有得諗，但因為冇外資大行品題，千祈唔好以為可以好似自然美（157）咁熱鬧，升得多時又夠成交，建發只宜小注怡情，玩吓就算。
建發今次以每股1元，發行7200萬股，其中新舊股各佔一半，集資淨額只得3100萬元。點解大部分新上市公司都賣咁多舊股？經紀陳就鬧小初明知故問。
小初好耐之前都聽過有大陸佬照起隻股，上市應該有得炒。不過睇張通告，原來因為公開招股部分獲28倍認購，所以要由配售部分撥回720萬股。經紀陳話數目唔算多，唔使驚好似啟帆（646）事件重演，突然多咗街貨，令隻股頭幾日炒唔起。
小初擔心保薦人有超額配股權可以行使，可以配多成千萬股貨，令貨源增加。經紀陳話斷估佢哋唔會搞亂個場。 慕容小初