隔晚新聞，伊拉克停止石油出口1個月，IBM又發盈警，虛驚一場，美股尾市冇事。
港股有得升，雖然恒指進帳只係得10點，不過期指升幅大啲，短期個市有望好番啲。盈富基金銷情慘淡，過多幾日，淡化埋，到咗下禮拜一賣地，地產股又嚟過。4隻主角地產股，昨日3隻上升，1隻冇跌，有啲啟示。可以諗吓執番些少地產股Call輪，對象係新地Call輪9115同長實Call輪9063。咁啱，兩隻Call輪都係收33.5仙。
恒地（012）同新世界（017），相關Call輪交投淡靜，暫時冇新地同長實Call輪咁正。
3大電訊股，電盈（008）升3仙，最醒係佢，中移動（941）升15仙，升幅細過電盈；聯通（762）跌5仙，收7.20元，上禮拜低位7.10元，估計守得住。
聯通守得住低位，則搵隻Call輪揸吓無妨。聯通Call輪交投麻麻，唯一可以望多兩眼嘅係9035，11月到期，現價14.8仙，溢價9.4%，槓桿率4.9倍。講爆炸力，限於槓桿率唔夠大，始終比唔上中移動Call輪。 章盛