年初公布10合1併股嘅天行國際（993），併股程序都未完成，就公布先舊後新配股，雖然噚日天行股價跌咗5.7%，但經紀陳話批貨都未出街，睇怕好戲在後頭。
天行今次以先舊後新方式，每股作價24仙，配售4540萬股。雖然手貨佔已擴大股本16.65％，但集資淨額只得1090萬銀咁大把。
經紀陳話，天行老闆係做大事嘅人，點會為咗區區1千萬銀，在股價咁低殘時配股，而配售代理亦係冇寶不落嘅證券行，所以冇理由冇後着。
此外，呢批配售股份，分別喺993「櫃台」上板600零萬股，然後又喺臨時「櫃台」2923上板3910萬股。雖然993個「櫃台」跌咗5.7％，收23仙，但唔計呢手600零萬股上板，其他成交股數只得300萬股左右，而2923個「櫃台」除上板個手交叉盤外，幾乎冇成交咁滯，股價則收25仙。
經紀陳話話一句講哂，成手貨根本冇出到街。
慕容小初