昨日阿董去有線新設嘅數碼新聞中心啟動禮，入場時逐一同三、四十位嘉賓同有線記者握手。阿董首次有機會按動「播放中」按鈕，啟播下午五點正新聞報道。佢同有線新聞總監趙應春講，自己睇新聞就睇得多，接受訪問都好多次，但到底新聞點樣製作出街就一無所知，所以對有線嘅新聞中心好感興趣。可能因為咁，阿董噚日有啲似大鄉里出城，見到乜都問。
阿董重同趙應春講，自己每日凌晨四點就起身睇有線嘅二十四小時新聞。搞到趙生好緊張，拿拿聲叫下屬睇緊啲嗰個鐘點嘅新聞；梗係啦，難得香港第一領導人都係捧場客。阿董咁畀面，有線打蛇隨棍上，送咗一件加大碼風褸畀佢，前後都大大隻字印住「有線電視」，講到明叫阿董日日晨運着住耍太極。呢條真係宣傳好橋，阿董一着上身就變有線嘅活動廣告板。
﹙圖﹚阿董收到有線為佢特製嘅風褸，騷完前又騷後畀記者影相，成個sales咁落力。而有線就將阿董嚟參觀當新聞咁不停大播特播，所以呢，傳媒又點會冇老細投資？
E-mail：