有朋自加拿大來，不亦唔知咩乎，總之係開心。羅漢請觀音，一人請一餐，畀錢埋單當然係一件事，但去邊度食啲乜先最傷腦筋，避風塘海鮮已有人請過、食京菜好食嘅地方又唔係太啱邊食邊傾長途偈、好食嘅上海嘢又太貴價，請唔起。
諗嚟諗去諗唔到嘅唯一解決辦法就係唔諗。交畀人諗。搖電話給灣仔「鴻星」酒家找愛麗絲幫拖，只簡單地交代了：八個人、簡簡單單但最好有驚喜、清清淡淡但唔寒酸、一切以唔貴夾飽為原則，有勞愛麗絲費心，拜託晒。
「憶苦思甜」是一味齋菜，有苦瓜、馬蹄及青紅椒，爽口、多色加一個勁名，頭威頭勢。
「蒜香焗鴨下巴」比台灣老天祿賣的那些更壯觀，除了脷根部份之外，更附送整個鴨下巴，重要係已經焗到脆卜卜，脆過食薯片。
「葱燒石頭魚春」係將一嚿應該係石頭魚嘅魚春，用葱從中間戙穿然後汁燒，香口微焦嘅外層包住千千萬萬魚子魚孫，有創意兼好好味。
「鵝肝醬片皮雞」顧名思義係脆皮雞加鵝肝醬釀在法國麵包上，事先講明食緊好嘢時唔准提「膽固醇」三個字，否則鬧。
「順德生菜包炸鯪魚皮」，「炸鯪魚球」食得多，「炸鯪魚皮」大約再香口十倍，愛麗絲教用生菜包嚟食，我就老虎都就咁食，香口過香口膠。
成餐飯好唔好食，一切靠晒陳奕迅首歌話齋：「愛麗絲喜歡甚麼氣味……」，結果是大家吃得愜意得不得了，一頓飯吃了，傾了四個多鐘頭，冇得頂。
愛麗絲，勞您費心，再謝。