港股噚日反覆偏軟，恒指跌落10723收市，又跌多107點。不過盈富基金（2800）依然冇人吼，主要係因為中東局勢繼續不明朗，而伊拉克又突然宣布暫停輸出石油，委內瑞拉油田又受工人罷工影響。呢一鋪都幾杰，恒指真係唔知要跌到咩水平盈富基金至可以清貨，有芬佬話至少要見10000點。係真唔係呀？
亞鋁（930）上周一請咗傳媒與證券界上南海睇廠，但有關新聞上周四至見光，公司話考慮收購電解鋁廠，重暗示可能會發新股收購。噚日亞鋁開始發威，急升至0.82元，升幅達17.14%，成交5360萬元。唔通係想發新股買嘢？據ｉ師傅話，亞鋁10送1認股證快將上市，每份認購價為0.77元，因此唔排除幕後人士想在認股證上市前，將正股炒上高於行使價水平，以便股證上市後方便散貨。
永隆（096）及永亨（302）噚日又傳出合併，但市場對呢單合併消息似乎已有啲唔耐煩，先前入貨班炒家開始想沽貨，以免兩行真係公布合併計劃時，股價反而會倒跌。永隆噚日一度升至35.20元，收報35元，升幅收窄至2.6%，成交1628萬元；而永亨升至27.40元後即回至26.75元收市，全日冇起跌。兩行合併消息傳到似層層，但最終被永亨否認。
沉寂已久嘅勵晶太平洋（575）最近好似轉勢，噚日勁升27％，收報0.30元。有消息話此股可能易手，但據阿虎所知，公司大股東想沽貨好耐，但要賣得出都唔係易事。
阿 虎