聽啲發展商講，𠵱家市民買樓，都唔會去到咁盡，只係借七成，用家庭收入四成去供樓，還款期12至15年，好少有20年或以上。但若發展商有二按，買家都會用埋，即係借九成或以上，好似有啲矛盾？原來係二按通常頭一兩年唔使還，若提早還又唔使罰錢，買家自然將啲錢放響自己身邊，等免供期滿先至還錢。
新地（016）同信德（242）合作嘅長沙灣昇悅居，每日有成幾萬人睇示範單位，而維持秩序嘅工作，就外判畀城市護衞。
戴德梁行一份物業報告指出，未來市政府中心福田區，位於華強北路嘅遠望數碼商城，呎租叫價最高達218元，同香港旺區有得比。羅湖東門步行街老街前衞店嘅呎租叫價最貴都係96元。去年畀得起租嘅行業就係服裝業。
近年地產代理搵食難，但亦有經紀做到好成績，好似中原青衣城分行A組嘅Judy何惠珠，曾因結婚生子而離開，最近重出江湖唔夠3個禮拜，就促成紅磡半島豪庭一個2306方呎相連單位，成交價1820萬元，中原收到35萬佣金，而佢就拆到逾10萬佣，差唔多等於新入行大學生一年收入。
蘭西