車厘茄比番茄嬌小，細細粒但水分多，而且食味比番茄甜，超市或果檔都好容易搵到佢嘅蹤影。
車厘茄有嚟自中國、澳洲、日本等地，最好食係日本貨，但售價亦最貴，半磅不足都要十零蚊。最經濟抵食係祖國出產嘅車厘茄，平均每磅都唔使十蚊，質素都唔錯，我肥媽最鍾意當佢小食嚟食，好味又健康，𠵱家可以喺部分果檔搵到。粒粒車厘茄夠紅潤，清甜而又多汁，喉嚨乾涸食幾粒即時可以滋潤番晒。
$4-$6磅
部分果檔有售
繼部分西瓜上市後，蜜瓜亦上市，家陣喺部分果檔已經可以搵到蜜瓜嘅蹤影，大多數係美國進口貨，因為上市無耐，加上美國「九一一」事件後，今年入口嘅蜜瓜稍為貴咗啲，往時大概二十零蚊都有一個，今年就要三十零蚊。繼我肥媽話，貴係貴啲，但質素總算唔錯，瓜味濃，水分足，食落又甜又爽，人少少買半個，都係十幾蚊啫！
$32個
部分果檔有售
文：肥師奶