香港年年有人破產，二○○一年破產人數創下歷史新高，所以識得某某朋友破產，不足為奇。之不過，打開《蘋果日報》，見到某位股壇老手俾司法常務官頒令破產，馬主T、馬主H等竟然拍掌稱慶，好似好心涼。
佢哋唔係生性涼薄，只係覺得呢個上天好公道。
至於破產老細囉喎，喺商界亦係名人，自稱師奉國學大師，精研佛學，同佢打過工嘅人以前話畀馬主H聽：「老細好識八字風水㗎，同佢做嘢，都要算算八字，睇吓夾唔夾。」識得又點呀，咪一樣投資瓜水，俾銀行追債追到暈，卒之還唔到，破產收場。但馬主T就聽到一啲老友話，老細雖然叫做破產，但一早做好安排，家人衣食無憂，佢就做閒雲野鶴，喺神州大地各大省市，飄呀飄，飄到西北、東北、哈爾濱，都唔知點樣先至可以搵到佢。
雖然話老早識埋下伏線，世界上冇人願意俾法庭頒令破產嘅啫。老細之所以買樓買股票損手爛腳，皆因經常摸頂之後大市就跌之故。咁夠運嘅？哈！一位跟佢做過短期對手嘅人透露，老細有一位「活佛」侍奉左右，指點迷津嘅。
唉，世事難料，「活佛」都睇唔到金融風暴之後，樓市會低處未見低嘅啫，正係神仙都死，何況香港「活佛」吖。