任港秀、康華、「啤妹」蔣怡、陳霽平、李思蓓、鍾麗淇同好姨薛家燕等，前晚去咗尖沙嘴欣賞新片《孽愛傷痕》首映禮。唔知係咪因為近日天氣開始熱，成班青春女星都換晒季，佢哋唔係着tubetop，就係以小背心示人。
最近身形弗咗好多嘅鍾麗淇，佢身穿小背心、包住時款嘅頭巾單獨赴會，青春可人。鍾麗淇話：「我最近接咗廣告，所以專登keep弗啲，我遲啲重會去澳洲影相，到時會去玩笨豬跳同激流。」任港秀前晚就着tubetop襯三個骨牛仔褲，露出香肩同小蠻腰。
此外，好姨話前晚同阿爸食飯嗰陣，竟然有人打電話畀佢，話好姨爸爸喺深圳入咗醫院，好姨梗係即時踢爆對方講大話啦。
馬薛芷倫噚日同仔女喺金鐘太古廣場購物，佢哋去JumboGrade書店買文具，然後又去咗HongKongRecords。有記者問馬薛芷倫，有周刊報道指馬家嘅家庭聚會總係冇佢份，亦甚少見佢帶仔女出現，佢回應話：「咪由得人哋講囉！」講到佢早前去Gucci派對同外籍男模同車離開，問佢有冇俾丈夫責罵？佢就做出「拉鏈封嘴」動作，表示唔回應。
楊思琦噚日返電視城拍新劇《繾綣仙凡間》，佢喺化妝間一見小朋友就就即刻捉住唔放，猛咁逗人同佢玩。楊思琦唔止有愛心，原來重好有公德心同防火意識㖭。佢見人哋啲煙頭隨便掉落垃圾桶，佢怕會火燭，就拿拿臨搵水淋熄啲煙頭。
韓片《我老婆係大佬》上周四開畫，一日就收咗七十五萬，已經係謝霆鋒套《戀愛行星》上咗八日嘅一半票房，成績算唔錯。不過近排有《我》片嘅水貨正版DVD流入香港市面，但淨係得英文字幕，喺旺角都有得賣，一百六十幾蚊就搞掂，唔知對套戲嘅票房有冇影響呢？
無綫前藝員陳儀馨自八二年「嫁個大馬有錢人」後，搖身一變做咗大馬富豪，最近佢重做埋大馬高級拿督。日前佢喺大馬接受車淑梅主持嘅港台節目《舊日的足跡》訪問，問佢做咗大馬高級拿督嘅心情，佢話：「心情好興奮，可以喺呢個重男輕女嘅地方攞呢個殊榮，真係有少少驕傲。」
方力申噚日去咗荃灣愉景新城，出席《仙履奇緣》卡通人物模仿大賽。問方力申有冇試過因衝動同人打交，佢話：「男人打交都係不外乎為咗錢同女人，不過我唔係為女人，係為錢。向我借錢嗰個係我好朋友，佢唔還錢，重講到好似係我唔啱咁，所以好嬲，雙方有啲推撞。」