中國國腳後衞孫繼海喺曼城成功升班後，如無意外，下屆就會成為第一個效力英超聯球隊嘅中國球員，認真可喜可賀，而身為炎黃子孫嘅我求大俠，亦都好替佢高興；不過，對於有啲傳媒即刻大事報道孫繼海有得踢英超，我就有啲保留。
並唔係我求大俠潑冷水，但係喺曼城成功升班後，佢哋嘅領隊基瑾已表明會大事擴軍，好似艾芬保同埋戴維斯呢啲世界級球員，都係曼城嘅目標。基瑾重話，由於上屆曼城升班後用地莊踢超聯，失咗好多波，結果搞到降班，下屆升班之後唔想重蹈覆轍。照咁睇，喺𠵱家都唔係成日做到曼城正選嘅孫繼海，下屆升班如果想有得踢，就一定要更加努力同埋睇佢嘅際遇喇！
唔知大家有冇留意，剛過去嗰個禮拜六啲波好鬼邪，喺上周中歐冠盃贏盤嘅球隊好似曼聯、拜仁慕尼黑咁，禮拜六時通通輸盤；反而喺上周中歐冠盃輸盤嘅球隊好似拉科、巴塞同埋皇馬咁，禮拜六就贏到笑呵呵，唔到你唔信。唔知喺呢個禮拜二、三嘅歐冠盃，剛贏盤嘅球隊會唔會又輸盤呢？
前兩日有消息話國際米蘭想將朗拿度借返巴西彭美拉斯，消息都未證實，又即刻傳出朗拿度嘅贊助商NIKE出面阻撓。鬼咩，如果哨牙仔真係返巴西，球迷都幾難睇到佢踢波，無晒宣傳價值。講到尾球王變咗人球，前途俾贊助商主宰，冇計啦！
都話做領隊難㗎啦！好似阿仙奴領隊雲格咁，雖然「兵工廠」𠵱家喺英超聯形勢大好，不過雲格一樣有嘢煩，皆因佢哋嘅隊長阿當斯今季聯賽上陣暫時得七場，要上陣十場先有冠軍獎牌攞，但另一位中堅基昂又想多啲上陣爭入英格蘭世盃隊，搞到雲格左右為難，如果收起蘇甘保派阿當斯同基昂出場，又怕球隊失分……唉！真係煩！
好多人都話麥基迪嘅打法及身手十足當年公牛時代嘅柏賓一樣，不過魔術教練李維士就唔同意，佢話柏賓只不過係「二佬」，成日要靠「老大」佐敦射住；但麥基迪今日已經係魔術嘅龍頭一哥，成隊波靠晒「單天保至尊」，所以柏賓嘅角色只不過嘅羅賓，而麥基迪就係主角蝙蝠俠。計我求大俠話假以時日，麥基迪唔只係Batman，重可能係NBA嘅Superman。