西九龍3大樓盤展開搶客戰，成為近期市場焦點，其中新地（016）嘅長沙灣昇悅居就係主角之一，因係首度亮相，所以幾日來都吸引大批市民排隊睇示範單位，而地產代理亦駐重兵拉客入票。美聯物業同中原地產都有幾百經紀在場，美聯大部分高層都出動，包括一身便服嘅主席黃建業，實行大晒冷。
昇悅居今次冇畀新地會會員買樓優惠，但現場設有該會嘅counter，搞咗個「即場樓盤精句」遊戲，參加者有機會贏得樂聲牌DVD一部。唔知新地日後會唔會用得獎嘅作品做廣告宣傳呢？而會員睇樓換贈品嘅優惠就繼續，只要睇兩個新地嘅樓盤，攞印花就可換贈品。
昇悅居吸引市民排隊睇樓，重吸引埋長實（001）精英到場，當然唔係入票，而係響附近派隔籬泓景臺同尖沙嘴港景峯嘅宣傳單張，實行大包圍。
美聯工商舖部3月份營業額突破960萬元，該公司營業董事郭應龍預期，下半年市況會重好啲，響過去一個月請咗16名員工，下半年重會請多25人。
蘭西