中保永興（621）不時都出現賣盤傳聞，但一直只聞樓梯響，未有成事，上周四股價突然出現異動，無端端升咗8.9％，收20.8仙。
由於隻股上周四成交金額有成2百萬銀，比起閒日冇成交實在有多少唔尋常，搞到小初心郁郁，諗住可能有嘢發生，四圍走去問人。對細股價素有研究嘅靚女經紀話，今次應該係虛火居多。
靚女話，顧名思義，中保永興其中一個阿媽係中國保險，但中保（966）都上咗市咁耐，中國保險再揸住中保永興股份，其實都冇咩意義，要解決問題，賣盤係其中一個方法。
早幾個月前，聽聞有班表叔睇中咗中保永興，但收尾搞完一大輪又冇下文，近排再冇聽過話有同買家傾嘢。
不過，中保永興嘅股份雖然叫做歸邊，但其中有一兩個大戶舊陣坐落一大批蟹貨，久唔久會出嚟活動吓，唔排除今次係佢地搞搞震。
慕容小初