海外試車：
瑪莎拉蒂Coupe　跑格誘人

本報記者意大利實地測試
意大利瑪莎拉蒂汽車，自歸入法拉利車廠控制後，可謂狀態大勇，除於較早前推出全新Spyder開篷跑車外，最近又宣告推出頂級Coupe跑車，並同樣以高性能表現為賣點；為讓大家能得到第一手消息，我哋嘅特約記者更親赴意大利，並對呢款全新瑪莎拉蒂Coupe跑車，作首度實地測試，從而睇睇呢部新車有何吸引力。

特約記者、部分攝影：湯偉君
鳴謝：部分圖片由瑪莎拉蒂車廠提供

3200GT與Spyder的結合 新款瑪莎拉蒂Coupe跑車，外形上與3200GT頗接近；如果對瑪莎拉蒂唔熟悉嘅朋友，重可能會誤將兩者混為一談㖭。其實，兩者內外均有不同，外表上最明顯之處，會係頭冚嘅兩排魚鰓式透氣孔已被取消，而車頭泵把重有新造型嘅擾流設計，令人一望而知Coupe係一部新類型嘅跑車呢！
至於車體方面，Coupe採用咗Spyder嘅機械設定，包括有輸出390匹馬力嘅4.2公升自然吸氣V8引擎、取自法拉利F1波箱嘅6前速Cambiocorsa半自動波箱。另外，重有Skyhook自動調節懸掛系統，呢啲設備都係喺Spyder身上率先應用；同時，亦都可以咁話，新Coupe係一部改良自3200GT跑車嘅外形，並融合咗Spyder跑車機械設計嘅結晶品。

車廂布局華實俱備 雖然Coupe跑車嘅車頭及車尾造型與Spyder幾近一樣，但實際上兩車嘅體積卻有分別；Coupe嘅軸距有2660mm，比Spyder長220mm，而車身亦恰好比Spyder長，有4,523mm。主要原因係呢部全新Coupe跑車，係一部2+2座位布局配搭，除前排嘅雙座位外，後座空間亦足以容納兩位乘客，闊落程度比保時捷911跑車為大；再加上一個尾箱，可謂有頗高嘅實用價值。至於車廂布局方面，前面嘅操控台與Spyder設計一樣，所用嘅材料同手工，都完全稱得上合乎瑪莎拉蒂跑車一貫嘅聲譽，其豪華裝備更會使人一坐就難以忘記㖭。

加速感更勝Spyder
喺意大利嘅高速公路上，正好一試Coupe嘅威力；據廠方嘅數字顯示，Coupe由0至100公里加速需時僅為4.9秒，極速更達285km/h，比Spyder稍勝一籌。主要原因係Coupe嘅車重比Spyder稍低50kg，因此喺車重同馬力比例上會有些微優勢，將呢個優勢用喺直路加速上，明顯可見Coupe會有更強嘅加速力。另外由於軸距較長，故此喺狹窄嘅彎路上就稍為不及Spyder靈活；但利用軚盤左右嘅+/-轉檔桿，一樣能感受有快捷安穩嘅轉檔反應，而呢套六前速半自動波箱，更可以稱得上係現時超級跑車最佳嘅自動變速系統㖭。

記者試後簡評
優點：
新款Coupe較原來3200GT及Spyder，有更得體合適嘅外形；而馬力及車重比亦有一定優勢，從而有更強嘅加速感。

缺點：
給擴展後嘅前後軸距重視舒適性，但卻損失咗一定嘅操控感；而跟3200GT近似嘅包裝，亦未見有突出個人風格。