國泰航空機隊數目多達七十五架，每年喺機艙內都遺失唔少物品，令公司營運成本增加。國泰董事陳南祿上月喺國泰城主持員工簡報會解釋去年盈利大跌時，就提及舊年喺機艙內，總共唔見咗九千幾個不銹鋼冰勺，令國泰要多賣一百零二張機票先足夠重新添置這批失物。
八方聽聞，喺國泰航機上遺失嘅物件，唔少都係被旅客當紀念品擅自取走。呢啲紀念品包括一啲印有國泰標誌嘅餐具同毛氈。唔好以為擅取機上物件嘅旅客，都係坐經濟客位嘅，聽聞商務客艙及頭等艙都發生過類似事件。不過，由於國泰明白旅客唔係存心偷竊，所以多數唔追究。
至於成為「熱門失物」嘅，就係國泰最近喺商務客艙內使用嘅鵝蛋石形鹽瓶同胡椒粉瓶，由於外形精緻，一推出即大受旅客歡迎，結果大批大批咁「流落民間」。國泰機艙服務部有見及此，就索性將呢套精品列入機上銷售貨品之一，每套賣一百二十蚊，既可滿足旅客對精品嘅「熱愛」，又可避免流失兼賺番筆。
除遺失嘅冰勺外，國泰要賣十八張機票，先夠抵償喺辦公室內裝設一個基本工作台成本；而國泰嘅電話費開支，就等於賣近一萬七千張機票嘅收益。
E-mail：