放假3日期間，中東局勢似有轉機，美國公布嘅就業數據中性偏好，美股則回穩，杜指在上周四及周五兩日共升73點，報10271，但係上升動力始終唔多夠。
喺國際壓力下，美國總統布殊終於開聲，促請以色列撤軍，並派國務卿鮑威爾本周前往中東斡旋。呢件絕對係好事，鮑卿此行有冇成果，應係市場短期焦點，大家要昅實。
從近日公布嘅經濟數據所見，美國經濟經過首季急速反彈後，步伐開始減慢。不過咁都好，起碼聯儲局唔使急於加息，故此趙飛雲暫時仍以中性偏好視之，但係大家一定要留意日後嘅數據是否進一步轉壞。
睇完外圍形勢，斷估港股今日唔易有突破，大市牛皮居多，但個別股份同國企應該有啲睇頭。倉內嘅佑威（627），若見0.72元可補回先前沽出嘅5萬股，如先見0.80元之上，則可逢高沽出獲利。重慶鋼鐵（1053）若破1.18元阻力，將挑戰1.25元，可以1.11元作止蝕位持有。至於和黃Call輪9110，正股和黃（013）上周3個交易日低位都係66.50元，可以作為止蝕參考。
趙飛雲