以往波衫係踢波裝備，但唔知幾時開始就同潮流成直線關係，今屆世界盃熱潮可以話係由撈過界玩Fashion的Nike開始，一個簡東拿做球證的廣告、一對設計獨特的波鞋，再加狂谷的宣傳攻勢：廣告、網上遊戲、手機SMS，同埋唔同形式的宣傳，誓要你同我被洗腦，差啲唔記得，原來Nike唔係Official世界盃贊助商，但其風頭之勁，一時無兩。望望其今屆推出的國家隊波衫，世界盃已經殺埋身！
記者：馮彥彰 攝影：林栢鈞
化妝：Janice Model：Joyce＆Janice
各大小時裝雜誌齊齊玩女仔SportWear、玩足球、做波衫，包括有好出位的《Studio Voice》，將波衫Styling影得好鹹片Feel。重有好有Feel的《TheFace》成班Model着波衫玩爛泥。唔少得係日版《Vogue》嘅「運動版波衫泥漿打鬥」。證明波衫再唔係男仔專有！
今次Nike推出的最新系列波衫其實分三大類，分別係國家隊波衫、Fans必買Tee、同埋練習用波衫。國家隊波衫包括：巴西、葡萄牙、韓國、俄羅斯、尼日利亞、克羅地亞、美國及比利時。而FansTee就設計質料都較簡單，不過應節用都冇計，睇波時係人都要有一件。
𠵱家買衫除了要靚，總會加上一堆大家唔明未必識讀的科技名以增加購買度，等大家覺得好抵買。今次在波衫中加入了一種叫CoolMotion的新科技，布料內層使用了一種叫Dri-FIT纖維物料，可以使波衫更輕及舒適，更可以迅速吸收同擴大汗水範圍，咁就唔怕一邊踢波一邊濕身。至於重量有幾輕，官方話比Nike以往的球衣輕了22％!
相信廣告大家已見到，朗拿度、戴維斯着住周圍踢，鞋形都算係史上最靚，名字就叫MercurialVapor。配合腳形的設計，所以着上腳好貼，不過由於有釘的關係，相信着出街機會不大，反而最欣賞係用料上面，用了一種叫NikeSkin的布料，只有3mm厚，的確係造鞋界一大新發明。
NikeShop（28955668）
銅鑼灣JumboSOGO四樓