明星為了保私隱，開飯都愛包廂或到隔涉食肆，位於跑馬地街市的大牌檔，在無遮無掩，再加一面大玻璃窗的格局之下，竟能吸引大小明星來搵食?!味力不凡可見一斑，究其得寵原因是甚麼？先有抵食鎮店招牌翅，分量夠味道好；後有每季幾款新口味創意小菜；加上水準穩定，開店六年如一日；差啲漏咗風趣的老闆，健談幽默的他最關注食客意見；加起來就構成明星街坊爭相幫襯的名牌食肆。
記者：楊一凡 攝影：陳穎
容祖兒必食
月兒彎彎的水盆翅，一排過夠體面，每鍋約六至七両，水盆翅口感爽滑，貨真價實，絕非碎濕濕如粉絲。上湯底用老雞和雲腿等熬足兩粒鐘，味道濃郁。其實湯底的味道是魚翅取勝的關鍵所在，師傅在時間方面要拿揑得準，才能炮製出水準穩定的燉翅。想試日限十鍋的大鍋翅，一定要預訂。
Kissy和朋友試味：個湯好鮮甜，飲咗又唔口渴，魚翅好滑，二百幾蚊，又不收加一，好抵食，另有$68細盅燉翅，水準跟大鍋的一樣。
謝天華至愛
要突出生蝦的鮮甜，非白灼莫屬，茄汁或豉油王乾煎中蝦，醬汁味濃只會扼殺鮮味，惟有甘香正氣的高麗參，其清淡跟蝦味相投，在味覺上平分春色，點點的鹹香則由雲腿絲代勞。拍攝當日約是十両蝦，時價是$110，另加$28高麗參雲腿材料費，故合共$138。
Amy試味：蝦常配薑葱，未見過同高麗參一齊，配搭好新鮮，味道好清甜，帶甘甘哋的參味，幾得意又清淡，沒煎蝦碌的油膩。
陳奕迅鍾情
鱔卷看上去相當飽滿，它捲了甚麼落肚呢？咬開看看，原來是爽口的蝦膠；大廚先替白鱔去骨，薄切成塊塊透光的鱔片，然後在片上抹些蝦膠，捲呀捲，變成壽司飯大少，便可以落油鍋、泡油、上色，然後加甜燒汁，兜兩兜，加色。以兩排陣式，威風凜凜列隊出場。
谷太太試味：鱔卷好在無骨，大人細路都啱食，鱔夠油滑，咬落好香口，個醬甜甜哋好似日式醬油，本身調味適度剛好，淨食也不覺太鹹。
陳彥行例牌
豆腐菜式老少咸宜，但來去都是紅燒、椒鹽或清蒸，太悶。豆腐，乜都裝得落的旅行喼……「叮」啟發了郭老闆創作新菜式。先把豆腐開邊切，挖個凹位，讓炒香的菜粒、肉末、蝦仁、帶子、冬菇粒和魚翅填滿，冚蓋，伴時菜，加鮑魚汁芡，矜貴登場。
郭老闆試味：箱子裏那塊水盆翅，替菜式畫龍點睛，用鮑魚汁芡取替蠔皇芡，一來味道更鮮，二來讓菜式從頭矜貴至尾。
Twins至冧
靈感來自食神的漿爆牛丸，不過是改良版，有見爆漿吃起來不方便，既燙口又會噴濕衫，腦筋急轉彎，用芝士粒取替湯汁，「杰撻撻」的芝士動作遲鈍，你定能一口咬定，阻止滲漏；牛丸較硬身，於是乎用蝦膠取代，但炸起來皺皮喎！沾些少麵包糠啦，好睇得多。經過不斷嘗試，蝦丸終於誕生。
谷先生試味：炸得夠晒乾身，全粒的顏色都好平均，好香脆，芝士的酥香又滑又軟，令人好回味。
鄧兆尊必點
先替豬肋骨做四個小時的蝦醬Mask，確保蝦醬的鹹香已滲入豬小姐的肌膚，然後走油、上色；跟手扭細個火，用熱油浸熟豬肋骨；眼見時機成熟，馬上搶火，即扭大個火，把豬肋骨炸番乾身，把香脆到痹的蝦醬骨鋪在金黃的炸蒜茸上，搞掂。
試味報告：豬肋骨好入味，咬落又不覺油膩，送啤酒一流，不過最好係一口豬肉兩啖蒜茸，香到呢……隔幾遠講嘢都聞到。
店名：嫦記
電話：28822994
地址：跑馬地毓秀街熟食中心二樓2號舖
座位：80個
營業時間：上午10時至下午2時半，晚上6時至12時半。
付款方法：只收現金