黃秋生去年初才加盟英皇電影部，簽下兩年合約，但合約只剛過了一年，秋生竟與英皇提前解約。導火線是過去一年他除參與成龍的電影《Highbinders》外，其餘時間則無工開，令秋生非常不滿。
黃秋生去年初加盟英皇，只拍了一部成龍在泰國取景的《Highbinders》，便和英皇解約。
秋生前日在電話中直言英皇令他很失望。他說：「當日我同佢哋簽咗兩年約，規定一年拍三部戲。通常演員係一次過攞咗筆錢先，但我諗住公平啲，所以同佢講筆錢可以開工先畀我。點知成年英皇得一部《Highbinders》搵我拍，其餘時間就喺度混吉。」
秋生續說：「咁一年過咗你哋唔開戲我都要收錢，點知佢哋咿咿哦哦，好似想連幾嚿水都慳番唔使畀。咁唔係我唔做，係你哋冇嘢畀我做，催你哋幾時有工畀我開，又冇人答到我。佢哋嘅態度令我好唔舒服，咁不如找咗上年條數，今年解約了斷。」
秋生說除了拍戲外，英皇連當日曾答允為他舉行宣布加盟英皇記者會的承諾亦沒兌現。他說：「邊有經理人將件貨物（藝人）擺喺度唔推廣，連廣告都唔識傾，搞到價錢都要我自己去問，淨係打張合約出嚟我都識啦，使乜你做啫，我自己做重要抽埋佣畀你。請啲保母重荒謬，唔識做不特止，重完全冇commonsense。」
問秋生臨別英皇有否跟老闆楊受成接觸過？他說：「冇喎，不過之前碰過面，佢重笑住話搵日同我傾吓偈，點知𠵱家唔使傾囉。」
黃秋生坦言今次簽經理人的經歷令他留下陰影，他說：「以為簽大公司會好啲，點知又係搞成咁。真係對香港經理人公司冇晒信心，今後我寧願靠自己好過。」
採訪：盧雪琪