睇娛樂版王菲與謝霆鋒張柏芝新聞，左丁山望吓就算，女孩子就討論不休；王菲上京在機場拍嘅照片，面容清瘦憔悴，好似唔多掂，唔通真係好傷心？左丁山一時口快，講咗一句：「菲鋒戀有年齡差距，唔係happy吓就算嘅呢咩？使乜咁傷心呀！」
真係衰多口，尤其是係喺女孩子面前講。秘書Y立即反駁：「唔通松霞戀就得？阿松都係玩吓㗎咋？」咦，話中有刺噃，原來現代女性嘅想法同大男人、小男人完全唔同。秘書Y嘅意思即係話中年男人五十歲都可以與二十三四歲女子談戀愛，談婚論嫁，王菲只係三十幾啫，同一個二十歲出頭嘅男仔行埋，有乜唔得先？𠵱家講男女平等。老夫少妻冇人出聲，老妻少夫又何以令人側目？論名氣，王菲與阿松、阿鋒與阿霞，不相伯仲，兩pair戀人，有乜唔妥呀！
以世俗眼光睇，假若梁王戀、謝伏戀，就係天造地設金童玉女。偏偏梁伏戀、王謝戀，於是議論四起。左丁山俾秘書Y窒咗一窒，即刻諗起性別之爭，好大件事，唔再糾纏。
《金融時報》一個專欄話美國目前政局，正係男女性別之戰，克林頓係最女性化嘅男總統，布殊係最男性化嘅牛仔總統，佢嘅國家安全顧問賴斯亦係最男性化嘅女博士，如果要了解佢哋嘅辦事方式、政策，就要以gender之分別嚟做分析。睇完篇專欄（四月三日），令左丁山諗緊阿松究竟似克林頓還是似布殊？