我肥師奶無果不歡，乜嘢水果都鍾意食，呢排見到血根李，大約十蚊磅，唔算貴，我都買咗幾磅同屋企人分享。
血根李嚟自中國，夏天開始蒲頭，但來貨唔多，只有部分檔口至有出售。
血根李外形圓碌碌，果皮帶紅，果肉為深紅色，食嘅時候要小心免汁液濺到衫而難於清洗。質感爽脆，食味酸甜，無乜胃口食番個有醒胃功效。
$10磅
部分果檔有售
唔知大家有無發覺，最近細隻嘅魷魚，數量比大隻魷魚多，而且好夠新鮮。魷魚通常都係喺本地水域捉到嘅，大隻嘅魷魚分分鐘有十幾二十斤重，但𠵱家較多嘅小魷魚，每隻約五、六吋長，雖然細隻，但仍然有肉食，而且好爽口，必定要推介畀大家。
$14-18/斤
各大海鮮檔有售
文：肥師奶