何超儀與陳子聰相戀兩年多，認定男友是結婚對象的超儀，更已經帶過男友回家見父母，初時賭王何鴻燊還以為女兒帶了一個「基佬」回家，對陳子聰印象麻麻，但經過長時間了解，賭王終於改觀，超儀更表示其母十分喜歡子聰這個未來女婿。
何超儀生長於一個顯赫的賭王家族，選擇結婚對象要先得父母認可似乎是難以避免的一件事。超儀目前正與模特兒陳子聰拍拖，兩人感情發展穩定，早前超儀更已帶男友回家見過雙親。第一次見女友家長，陳子聰顯得戰戰兢兢，但「面試」總算Pass。
記者：記 何超儀：何
何：爹哋一早講明，唔係認真嘅男朋友就唔好帶返嚟，免得嘥佢時間，而我都諗住佢（陳子聰）係結婚對象，所以咪帶佢返屋企見吓父母囉。點知第一次見面，我爹哋直截了當問人哋做邊行，子聰就答爹哋佢係做模特兒嘅，當時我幾乎想暈低，個心喺度諗，點解佢咁鬼死蠢，唔話自己係大學畢業生。我爹哋聽見子聰話做Model，睇埋佢外表又頭髮長長，重誤會佢係基佬，以為我帶個基佬返嚟呃屋企人。
記：你爹哋有冇因為咁反對你哋繼續來往？
何：咁又冇，我同爹哋、媽咪解釋過之後，佢哋經過自己嘅觀察，知道子聰個人唔錯，𠵱家同佢都相處得幾好，媽咪不知幾鍾意佢。其實我男友個人幾儍氣，同爹哋一樣都係人馬座，性格都係好樂觀，只要有一個機會，必定可以有一番作為。
記：你爹哋身邊有四個女人，其實你可唔可以接受將來老公有你之外，重有其他女人？
何：咁就要睇吓自己有冇本事，如果我可以養得起自己就梗係唔可以啦！愛情係唔可以同人分享嘅，我自己亦會好專一。我自己深信有可以白頭到老嘅真愛情，雖然我同我男友性格都唔保守，但對愛情都幾執着，呢方面就唔係咁開放。有時你哋見我蒲吧，其實係我想搵人吹吓水，我好鍾意同人傾偈。