霍英東同賭王何鴻燊嘅恩恩怨怨，誰是誰非，真係各有各說，但其實佢兩個都係皇仁書院出品，份屬同窗，照計冇乜隔夜仇，而且兩人對母校都有情有義，連捐錢都鬥一番。
老霍呢排都係以「網球look」蒲頭，佢着緊嘅外套唔係乜嘢名牌，原來係皇仁一百四十周年嘅紀念外套。而皇仁喺今年初搞一百四十周年校慶兼步行籌款時，老霍唔單止做嘉賓，重二話不說捐咗一百萬畀母校；連皇仁嘅圖書館、禮堂冷氣都係老霍捐出嚟。
但賭王都唔弱，佢亦捐咗一筆錢畀皇仁搞咗個獎學金，回饋母校。
霍英東同何鴻燊都係三十年代入學，老霍係一九三六年嗰屆，何鴻燊就係一九三二年，論輩份係老霍嘅師兄㖭。八方唔知佢哋當年識唔識對方，但係就知道二人都係皇仁舊生會嘅永遠名譽會長，分別出席過唔同年份嘅畢業禮。
對皇仁嚟講，老霍同賭王都係大師兄，手掌係肉手背又係肉，真唔知幫邊個先至好？
E-mail：