自九四年參選港姐時穿過性感泳衣後，陳芷菁皆以密實look示人。最近她卻忽然性感，難道她想與同公司的林嘉欣、張燊悅、黃伊汶及周嘉玲等鬥騷本錢？但陳芷菁卻說：「今日我唔需要同班花旦鬥！」
陳芷菁的經理人公司「星皓」新人輩出，力捧的包括林嘉欣、張燊悅和黃伊汶等青春玉女，同公司的還有九一年港姐亞軍周嘉玲。而亞視更揚言今年招兵買馬，自製新鮮花旦。面對這樣環境，現年三十二歲的陳芷菁日前罕有地行性感，對於她而言，是否一個兵來將擋的最好方法？
陳芷菁日前說：「我從來都冇受威脅嘅感覺，因為近呢幾年我定位係喺主持同司儀工作方面，我好清楚自己生存空間喺邊度，我嘅籌碼係乜嘢。𠵱家我只視演戲為我鍾意嘅玩具，反而寫書、做主持先至係我嘅終身職業，所以今時今日，我根本唔需要同其他花旦、演員鬥。」陳芷菁說她今次肯突破一嘗性感，只是覺自己已長大，毋須為一件衣服給自己太多界限。
作為星皓的第一代藝人，陳芷菁不介意公司全力去捧一班新人。她說：「新人係需要培育，所以公司今日力捧佢哋，我覺得好正常。」
芷菁又說：「老闆峰哥（王海峰）對我好好，我生日佢重送咗隻表畀我。公司最近又幫我接好多廣告，所以我都希望外界唔好批評公司厚此薄彼，我亦唔覺得俾新人威脅緊。雖然好多人覺得我呢幾年喺亞視嘅知名度好似唔及喺無綫嘅時候，但其實我憑做司儀呢條路，賺錢比以前多，今日我喺娛樂圈好有安全感。」
採訪：盧雪琪
攝影：陳志嵐