牛津PenbrokeCollege因為涉嫌收捐款以交換「收學生」，鬧出風波。老牌名校收捐款唔奇，捐款與收生掛鈎，亦係國際一流大學嘅遊戲規則，不過人哋玩呢個遊戲玩得出神入化，不露痕迹，「彭布洛」學院玩得草率，故此中招。
呢日飯局上碰到高官D，講起大學生活，大把嘢講。做得高官，梗係大部份都出身港大嘅醒目仔啦。高官D話佢以前讀港大之時，一年級要考試，三年級考學位試，都叫做讀番幾本書，二年級係honeymoonyear，乜嘢叫做讀書都唔知。總之好易就畢業，全無難度，跟住考到做AO，一路升官，人生好快樂。幾時真係讀過吓「嚴肅書」呀？高官D話：「嗰陣AO要到牛津讀一年，初時去到，以為好似喺港大咁，依絲執，係咁意望吓本書就去上堂，點知牛津啲tutor制度之下，成班只得三個學生，一個講師，大家輪流講，講咗五分鐘就冇料。一科係咁，兩科係咁，一個星期下來，出醜兼面紅。惟有咬實牙根，照足參考書名單嚟讀，睇過晒先敢去上堂；一年之後進修完畢返香港，統計自己讀過嘅書，多過晒喺港大三年所讀嘅。𠵱家諗起，香港啲大學難入易出，理應改革！」
到牛津進修一年，原來對AO嘅教育水平大大提升，𠵱家啲新AO冇得去牛津，會唔會讀書同講英文都冇咁叻呀？高官D𠵱家咁口齒伶俐，對答如流，睇怕係牛津之功！