林敏驄（阿驄）日前喺沙田拍攝Bossini環保專輯，阿驄一見記者，就話唔畀緋聞男女謝霆鋒同張柏芝專美，所以佢都要搞下緋聞。
話口未完，佢就攬實一個鬈髮女子，重教記者遠距離偷影佢哋。個鬈髮女子一轉身，原來係阿驄老婆陳伶俐，佢哋夫妻檔拍專輯。
阿驄轉頭又要效法成龍，佢話對方有國際女星章子怡餵提子，佢都不甘示弱，有無綫新紮女童星成珈瑩餵食糖，阿驄話：「搞完偷情，重有一段忘年戀。有人有得俾人餵食提子好叻咩？我有個重嫩口嘅餵我食提子糖。」然後佢就捉住個小妹妹，重演大哥當年俾章子怡坐大髀餵提子嘅場面。
阿驄講十句中，有九句都唔係認真，但佢話唯一以下呢句就珍珠都冇咁真：「我最近晚晚有心有力！」原來佢想追多個小朋友，所以𠵱家晚晚同老婆努力造人，希望三年抱兩㖭！
李綺虹早排同黃智賢演出港台劇集《浮生錄影》之《愛@DV.Cam》，佢哋飾演一對因分隔異地而感情備受考驗嘅戀人。故事講述李綺虹因為想發展事業，而遠赴加拿大溫哥華做嘢，佢同黃智賢惟有靠傳送DV影像而維繫感情。點知當黃智賢飛去溫哥華探女朋友之際，先至發現李綺虹已經移情別戀。而呢部劇集就安排喺聽晚七點本港台播出。
陳司翰（Victor）噚日去咗銅鑼灣地帶，擔任商台節目《神州大地小儀國》嘅嘉賓。Victor話遲啲會同一個日本女仔拍MV，而呢個女仔曾經教過家姐陳慧琳（Kelly）日文。
對於近排有傳聞話謝霆鋒曾經追過Kelly，身為細佬嘅佢即刻為家姐辯護。佢話覺得呢單新聞嘅可信性一啲都唔高，而且Kelly只會同佢提及男友Alex，所以由此證明佢哋兩個嘅感情好穩定。
年輕歌手雖然追女好掂，唔少女星都俾佢追到手，不過佢嘅口德認真麻麻。話說早輪佢同影壇一姐搞埋，點知又𡁻完唱，私下同朋友講，話一姐叫牀聲好大，好彩最後一姐都返咗男友身邊。
馮仁昭聽年輕歌手把口咁衰都有啲反感，以後啲女星同佢搞埋，最好有心理準備俾人𡁻完唱呀！
形象懶健康嘅男歌手其實都幾細膽，舊年佢女友同某男歌星喺台灣搞足兩日兩夜，佢知道之後，嬲到即刻同女友分手，但佢重要俾女友鬧到狗血淋頭，都唔敢講出實情，只識得一個人匿喺屋企喊。所以𠵱家見到某啲人俾人拆穿真面目，佢就好開心，證明呢個世界重有天理。
影壇玉女啲感情生活都幾混亂，佢同男歌星搞埋之前，原來同對方嘅老友，合作拍完一部戲後已經搭上咗。佢哋兩個都係抱住玩玩吓嘅心態，最後好快就散咗。
影壇玉女近年走勢已經麻麻，再搞咁多緋聞，啲導演都怕咗搵佢，雖然有大公司力撐，但繼續搞咁多負面新聞，真係天王都撐佢唔住啦！
李安套《臥虎藏龍》揚威奧斯卡，據聞佢搞緊《臥虎藏龍前傳》嘅劇本，準備開拍。而劇情就會講奸角碧眼狐狸收咗個徒弟，叫做孅娘，潛入妓院，同李慕白大鬥法，而前傳開場時，重會有一場李慕白喺冰天雪地，同一隻大白熊搏鬥場面㖭。