大自然定律是春天開花夏天結果，不過今年則有點反常規，各式生果齊齊喺春天率先搶閘出籠，講緊嘅唔係樹上或地上嘅水果，而係各款頭上嘅髮飾，全部都以搶眼奪目或栩栩如生嘅鮮果造型面世，將鮮甜可口嘅士多啤梨、車厘子同提子等放上頭，讓各位小朋友大飽眼福。
記者：許穗齡 攝影：陳穎
ImageGirl：Charlotte
芸芸髮飾中，小記就覺得呢個吹氣士多啤梨橡筋圈最可愛，因為吹氣型嘅髮飾喺市面比較少見，都算幾創新；而士多啤梨配合吹氣膠造成脹卜卜嘅效果亦非常可愛，好鬼Cutie，用嚟送畀小妹妹一定𠱁到佢好開心。
食蘋果你可能會揀日本的迷你品種，不過原來其他國家嘅都唔錯㗎！好似呢兩款印有不同國旗的髮夾，就夠晒特別。蘋果髮夾以鐵製，上面嘅蘋果則以膠製，紮辮時當輔助髮夾用就最適合不過。
小記覺得女孩子始終都係紮兩條孖辮最可愛，呢款布製嘅士多啤梨橡筋圈就一定可以令佢加倍可愛。士多啤梨以印有圓點的紅色棉布製成，加上士多啤梨頂部的綠色小布，形態神似又夠趣致。
將假生果放喺客廳裝飾就見過，原來今季嘅髮飾都採用咗假生果作主題，實行將一個個直徑約2吋嘅石榴、檸檬當髮飾，真係幾搞笑。最抵死係所有膠製生果，製作非常認真，尤其係紅色假石榴，驟眼睇同真嘅無乜分別，真係要提防屋企內嘅小朋友當真咁食！
話明係雜果圈，當然係包羅萬有啦！呢個膠製髮飾由蘋果、菠蘿、楊桃、提子等生果串成，而且顏色多，生果有透明有令面，用嚟紮辮仔肯定閃閃生輝，當手鏈用都一樣咁搶眼。
呢款紅提子髮飾，以9粒膠製的紅提子組成，再以一個個小鐵扣連在一起，除了令外形更加真實之外，每粒提子都可以Fing吓Fing吓，再加上上面兩大塊翠綠色的提子葉，紮上頭效果新鮮有動感。
車厘子踏入夏天先至當造，想提早欣賞到又圓渾又大粒嘅車厘子，不如就幫囡囡買番個膠製嘅髮夾。車厘子髮夾有鮮紅色同桃紅色選擇，夾面有成兩吋咁大，不過夾位較細，只適合用作夾前蔭，效果都好可愛㗎！
嫌只得生果外形唔夠得意，可以考慮吓呢款加有笑面的西瓜橡筋圈。西瓜笑面以膠製，圖案以西瓜的紅色果肉及一粒粒西瓜核為主，驟眼看重以為西瓜核係頭髮，下面則加上一個開心笑臉，再以一環綠色西瓜皮圍邊，可愛非常。
LaForet（28319923）
銅鑼灣銀座商場1號舖
LabuMini（23855828）
旺角兆萬商場地庫一樓B105A號舖