十多歲開始，何超儀已夢想做歌星，她在加拿大中學畢業後，便回港跟家人商量要入娛樂圈發展，起初她的賭王父親並不贊成，只有大家姐何超瓊全力支持她。結果超儀終排除萬難晉身娛樂圈，至今已在演藝界奮鬥了九個年頭。
何：當年屋企人唔係咁贊成我入娛樂圈，但我發夢都想唱歌，所以返到嚟香港就話要做歌星，當時我重呃爹哋同媽咪，話只係入娛樂圈玩吓，咁爹哋話玩吓就冇所謂，所以先冇反對。但佢哋都諗唔到我一做就八、九年，屋企人都忍唔住再問我係咪諗住做死一世娛樂圈，我話如果呢行可以繼續容納我，當然想繼續落去。
記：你姊姊超瓊做咗澳娛董事，佢有冇叫你跟佢做生意？
何：家姐成日要我學做生意，但我興趣唔喺呢方面，我好想喺娛樂圈做出啲成績畀屋企人睇，等佢哋知我唔係玩玩吓，我係好專業同好有熱誠去唱歌同演戲嘅。好似最近我攞咗金紫荊嘅「最佳女配角」獎，演技受認同，真係好開心，𠵱家我鍾意拍戲多過唱歌㖭！
記：你𠵱家嘅收入夠唔夠開銷？
何：如果要唱歌就一定唔夠，因為唱歌置裝費好貴，淨拍戲就一定夠。𠵱家我都好慳，出嚟做嘢之後，盡可能唔想用屋企錢，不過屋企好錫我，佢哋提供咗房屋、工人畀我用，其他開支我就自己搞掂，信用卡數都係自己找。有時唔夠錢使，惟有同公司（英皇娛樂）借住糧先，𠵱家我重欠公司六位數字錢。
記：點解寧願同公司借糧，都唔問屋企攞錢呢？
何：出咗嚟做嘢，我就唔想太依賴屋企，更加唔想俾人覺得我係千金小姐唔可以捱苦。不過𠵱家經濟低迷，做藝人除非係人氣偶像，否則要爭取演出機會都唔容易，好似我一直渴望同杜琪峰、陳嘉上、張婉婷、陳可辛、關錦鵬同葉偉信嗰啲好導演合作，但有時唔係我想就得，自己惟有努力去做，希望終於俾人賞識。
記：揹住賭王千金個名喺呢行發展，會唔會有壓力？
何：壓力一定有，好似上次我俾狗仔隊跟蹤，用奶茶潑記者，事後爹哋都有打電話嚟話我。所以我做任何嘢之前，一定要諗吓會唔會影響家族聲譽。