民主黨立法會議員鄭家富早排遠赴匈牙利出席一個由自由國際聯盟舉行嘅論壇，取經學吓點做個反對黨，出席論壇嘅代表一係做緊反對黨，一係以前係反對黨，𠵱家就做執政黨，好似陳水扁嘅緋聞女友蕭美琴，就代表民進黨出席。
阿富同八方講，原來呢位阿扁身邊靚女智囊對香港問題唔多熟悉，阿富向佢介紹完基本法、香港政治架構之後，蕭美人問佢點解重有年輕人肯喺香港從政，因為根本冇前途，唔似台灣咁選唔到總統、立委，重有機會選市長同其他職位，如果係佢，佢一定唔會喺香港參政。
阿富聽完佢咁講只好苦笑，因為香港只得立法會同區議會選舉，出路窄到冇人有，佢同八方講，香港政壇再係咁搞落去，唔使阿董出手，民主派遲早都唔掂！
（圖）鄭家富（左三）話蕭美琴（前右三）一定唔會喺香港參政。 鄭家富提供相片
E-mail：