喺最近舉行嘅美國紐約車展上,佳士拿展出咗一款快將推出嘅新車;此車除外形突出吸引外,實用嘅車廂布局同出色嘅性能表現,亦係佢嘅賣點所在。佢係邊款新車?之唔係佳士拿全新嘅Pacifica囉!
從相片中可以睇到,呢款快者可望於明年初推出嘅Pacifica,造型極富流線形之餘,兼帶有些許跑味;當中一對炯炯有神嘅頭燈,襯以闊大鬼面罩組合,望落分外突出吸引,而開啟幅度甚大嘅尾門,配合車子本身嘅低地台設計,令乘客提存儲於尾箱嘅行李時,變得十分方便。
車廂布局亦見寬敞,加上以真皮鑲嵌而成嘅座椅;設備配搭又見齊全,除有高級音響及原廠冷氣外,另外更備有可作多段式調校嘅駕駛席、電動天窗等設備,以增強乘坐舒適度。至於機械方面,新車將會以一台3.5公升V6引擎,作為佢嘅動力核心,另外配合上一台4前速全自動波箱,更能令新車可有更出色嘅性能表現。唔知香港嘅車迷,有無機會一睹呢部Pacifica嘅風采呢?