家庭篇:幾房人仍然和平

家庭篇:幾房人仍然和平

自孩提時代起,何超儀已明白自己生長在一個富裕的大家族,除了母親所生的四女一子外,大媽那邊還有幾個姊姊和哥哥,後來父親何鴻燊再納三姨太和四姨太時,家族內的人事關係亦變得愈來愈複雜。

媽咪好怕有爭執
何:外面啲人成日以為我爹哋有幾個老婆,幾房人就會喺度爭,其實呢啲只係佢哋一廂情願嘅諗法,我媽咪係山羊座嘅,佢好怕有爭執,有事發生就會閃。嗰次我媽咪講「通臂猿猴點都勁唔過齊天大聖」嘅言論,其實係想話唔理老公喺出邊做乜,總之佢返屋企自己就會開心,媽咪根本冇意思同人爭啲乜。
記:咁你哋幾房人相處成點?
何:爹哋對個個太太都好,根本冇乜好爭,幾房人相處得好和平。
記:你爹哋有幾頭家,同你嘅親子關係會唔會好疏離?

讚老父性格樂觀
何:爹哋點忙都好,大時大節一家人都會返屋企食飯。其實由細到大爹哋都幾錫我,尤其係喺我入咗娛樂圈之後,佢重比以前擔心咗。屋企入面,我好崇拜大家姐(何超瓊),因為佢真係好叻,睇嘢好遠大,有時我有嘢諗唔明打電話問佢,重俾佢嬲我咁小事都打嚟問佢,不過家姐對我哋幾弟妹都好關心。

記:咁你點睇你爹哋呢?
何:我好欣賞爹哋,有次去公司(信德中心)搵佢,望住成幢大廈都係佢嘅心血,真係少啲精力都做唔到。爹哋性格樂觀、風趣,所有同佢做過嘢嘅員工都對佢有份尊敬,呢個係爹哋成功之道。當然有個咁叻嘅父親,我引以為榮。

毒品傷腦拒嘗試
記:早排羅兆輝暗示你哋何家有兩個女服食軟性毒品,賭王為此好勞氣喎!
何:梗係啦!爹哋對仔女管教幾嚴,俾人咁樣亂講自己嘅仔女,當然唔高興。其實讀過書嘅,都知啲軟性毒品好傷身,我去RaveParty,人哋畀啲丸仔我食,我真係唔會食,明知好傷腦,除非我想快啲有柏金遜症啦!我從來唔相信食丸仔或毒品可以減壓,有啲朋友成日食呢啲嘢,已經搞到記性好差,我都勸過佢哋唔好再食。
撰文:陳月媚
攝影:林德雄
協力:比華利
髮型:HermannLee&AB(Chin.G)
服裝:Helen
場地提供:LAVA