F4靚唔靚見仁見智，但你又知唔知其實佢哋係跟一套日本極受歡迎的漫畫《流星花園》而組成呢？之前電視動畫版喺亞視做過，有不錯收視，最新正版OVA《流星花園》（$78）都出咗街，連老翻都未有，古仔以笑料為重，四個大男孩加女主角笑料不停，而3區版冇日版咁多Bonus，但中文字幕譯得幾傳神，畫面做得唔錯，絕對有交代。
今個星期另一大熱係阿1，有唔少人開始搵番《殺手阿1》入面的編劇同導演嘅DVD，個個入去舖頭都係講：我想搵《阿1》套戲個位三乜乜？其實導演叫三池崇史，其電視劇《多重人格探偵》（$380）變態程度比《阿1》更勁，食人腦、變態殺人等等，早過《沉默的殺機》玩呢類題材幾年，唔少朋友睇完隻碟都話頂唔順，可惜冇中文字幕，但睇畫面相信都夠你嘔！
文：畢仁