天氣回暖又係榴槤當造之時，我肥師奶又可以大擦一番嘞。雖然早前都已經有金枕頭上市，但貨源都唔及家陣多，最近多咗果檔有金枕頭賣，金枕頭係榴槤中最好食嘅一種，味道香濃，果肉乾身但腍滑，食落又甜，鍾意榴槤一定話佢正，趁家陣天氣重未太熱，食榴槤都未致於會太燥，一次食多幾件至夠爽呢！
$6-$8/磅
各大果檔有售
莧菜係夏天嘅理想蔬菜之一，繼通菜上市後，白莧菜亦登場。白莧菜係夏日價廉物美嘅蔬菜，佢耐熱易於種植，遲吓盛夏嘅話，貨多價錢更平。天氣回暖，容易令人心煩氣躁，以莧菜滾湯佐膳，有清熱解燥功效。莧菜含豐富鐵、鈣質，補血功效亦甚佳，女士要進補食莧菜都可以，但體質虛弱者只宜進食適量。
$6-$7斤
各大菜檔有售
初春時份係石狗公較多產量嘅季節，呢排賣生猛海魚嘅魚檔時時見到石狗公蹤影。石狗公體形細細，每條約三吋長左右。石狗公頭大身細，唔算多肉食，但係我肥師奶最鍾意用佢嚟煲湯，啖湯特別清甜。
$28-$36/斤
各大海鮮檔有售
文：肥師奶