謝霆鋒昨日由台灣返港，終於直認已與王菲分手，他更愛屋及烏，公開維護女友張柏芝的雙親，力斥傳媒不應報道柏芝雙親的負面新聞。而柏芝母親亦謂霆鋒為人「可以接受」，看來霆鋒和柏芝的戀情已昭然若揭。
謝霆鋒與王菲分手，有傳是因第三者張柏芝介入引起，但霆鋒一直未肯承認與柏芝的情侶關係。霆鋒昨早從台灣回港，他在機場接受訪問時，竟開口力撐女友柏芝的雙親，對於近日有雜誌力數柏芝父母的不是，霆鋒顯得十分憤怒。
其實霆鋒過往亦很維護愛侶，例如他跟王菲拍拖時，便曾對記者追訪王菲囡囡竇靖童一事十分勞氣，可見霆鋒素來喜歡愛屋及烏，這次主動力撐女友柏芝家人，足證二人關係親密。
柏芝母親DaviesShally前日三度嫁人，她昨午跟新婚丈夫姚潤安離開中環麗嘉酒店時，亦力撐霆鋒並不花弗。柏芝母親又謂若女兒跟霆鋒拍拖，她絕對尊重女兒的決定。言語之間，已不自覺踢爆了柏芝和霆鋒的戀情。
霆鋒跟柏芝的「鋒芝戀」目前正鬧得熱烘烘，他昨日從台灣返港，甫抵機場，霆鋒已急不及待力撐女友柏芝近日被雜誌大肆抨擊的雙親。霆鋒說：「有一樣嘢我好唔開心，我係公眾人物俾人批評係應該，但唔應該批評人哋屋企人，我覺得好火滾，話人哋虎女無犬母，冇人有資格咁講。」
霆鋒愈說愈激動，他續說：「話人哋阿爸生性風流，佢搞過你呀？話人哋阿媽橫刀奪愛，你憑乜咁講，又話佢（張柏芝）成日換男友，佢同你換呀？天下父母都錫子女，邊個有資格咁寫，好想知係邊個寫，我想問佢個老竇同老母係犬定係虎？本雜誌喺人哋（柏芝母親）結婚嗰日出街，真係冇品到不得了。」
霆鋒於言語之間，十分維護女友柏芝的家人，但他對此卻否認道：「唔係，我緊張講人哋嘅老竇同老母啫。其實虎父無犬子又好，虎女無犬母又好，你批評緊人哋老母呀。我希望大家聽住，我唔係講粗口，再咁寫三角戀、四角戀，乜戀都冇，所以唔講啦！」
對於女友柏芝的又一居寓所門外被貼大字報，霆鋒說：「呢件事我知。」
問到霆鋒跟王菲分手一事時，他昨日終直認已與王菲分手，霆鋒說：「我同王菲（分手）唔關任何人事，唔想再講第二次，分手原因唔需要講點解。好似話我追Kelly（陳慧琳），以及同吳大維打賭追王菲件事，遲早大家都會明，我唔需要畫公仔畫出腸，分手始終係我哋兩個人嘅私事，從來唔關張柏芝事。」
王菲日前被傳為情自殺，問霆鋒可打電話問候，他說：「我喺台灣聽到陶子（陶晶瑩）個節目，寬姐（邱囗寬）話佢冇事，我聽到都安心啲，唔需要多講。」
最新一期《忽然１周》指王菲跟霆鋒拍拖時，花了五百萬元在霆鋒身上。對此霆鋒說：「我如果為錢同一個人一齊，我一定會揀一個富商，真真正正有錢嘅人，謝霆鋒唔會到呢個地步，就算瞓天橋底都唔會問女友借錢。我覺得近日嘅傳聞愈來愈離譜，多餘嘅。」
霆鋒返回山頂裕景花園稍作休息後，便又再外出，他駕駛其Audi座駕過海，為撇開記者追訪更不惜切線、衝燈和超速，非常危險。
而柏芝母親昨日被問到可覺得霆鋒花弗時，她說：「唔知，佢個人可以接受。」再問柏芝母親可支持女兒跟霆鋒拍拖？她說：「我睇個女嘅決定，佢一向處事都好成熟，我一定會支持佢。我對霆鋒最深印象係佢當日去醫院探柏芝。」
此外，陳慧琳昨日拍完Samsung廣告從韓國回港，早前有傳霆鋒力追她，陳慧琳說：「你哋冇睇報紙咩，我都回應晒。」
採訪：汪正文、陳梅香
攝影：陳偉權、娛樂突發組