這十年來，易鋆榮形容纏着他的病「數唔到咁多」：癌症、中風、高血壓、癲癇、腎病、多囊症、痛風、地中海貧血……，一派樂天的易先生對病有其非一般看法：「一種病、兩種病都係病，即係好似犯一條罪同幾條罪咁，都係同期執行啫！」
中風後左半邊身癱瘓的易先生要靠輪椅出入，但他仍活躍於一個由中風人士組成的互助組織──新健社，四出探訪病友，「佢哋以為自己慘，但係對住我，就唔敢出聲，比起我，佢哋個病就變得濕濕碎嘞！」說話不清的易先生努力地吐出一字一句。
現年五十五歲的易鋆榮，三十出頭便靠雙手自己創業，經營印刷製版的生意，每日工作十六小時，就在事業如日方中的時候，他突然中風昏迷。
「九一一事件全世界轟動，喺十年前九月十一日就我屋企轟動！」他幽默一笑後續說：「嗰日我開緊業主法團會，有委員爭執，可能受咗刺激，我突然間失禁，手腳唔聽使，上到十字車已經昏迷，之後入咗I.C.U.（深切治療病房）住咗一星期。後嚟醒番冇幾耐突然腦腫脹，醫生話七成冇命，就算醫得番都要成世瞓牀。」
險進鬼門關的易先生認真地說：「嗰次重見到一道好強嘅光，醫生話係極光，但唔知係唔係死之前見到嘅嘢？」
易先生有多種家族遺傳病，「我父母、伯父、堂阿哥都係爆血管死！我能夠生存，係好彩！」
還有一種遺傳性多囊症，令易先生肚內長滿水瘤，他找來一則收藏的剪報對記者說，有醫生指病者最後會出現腎衰竭，他說：「咁先知驚！」
話雖如此，但他又從容說：「啲醫生好歡迎我㗎，我有料（指住個肚），佢咪去攞料囉。」
易先生從不介意當人辦讓醫生實習，反而覺得可以給醫生一個學習機會，何樂而不為？
工作上堅持要搏要鬥的易先生，對病亦有同一番理論：「戰略上蔑視敵人，唔驚佢（個病），戰術上重視敵人，樣樣要小心，即係膽大心細，所以我對每個病都會戒口。」
百病纏身的易先生怎樣笑看人生？記者邊翻看他的相簿，他邊指着一張又一張他撇下輪椅躺在地上的照片說：「呢啲叫作親吻大地？」記者問是否象徵他對生命的熱誠？他點點頭。
易先生早前獲社會福利署選為「活出生命」優秀義工之一。
暖流熱線
電話：29908688
傳真：23702192
電郵：
網址：