收到一叠讀者電郵，要求左丁山解答，因為一啲涉及私隱，不便在此公開，另行作答。
讀者投資債券，一位讀者BF問：「我擁有中華民國一九三八年的金債券（goldloan?）（原函為英文），二十七年到期，是否有辦法取回本金？」一九三八年發行債券，即係一九六五年到期，過咗好耐咯，戰前中國曾發行債券，因紀錄不全，碰上抗戰、內戰，好多已經失散，中華人民共和國自然唔肯承認，所以讀者BF只能算擁有「牆紙」，唔係債券，根本冇方法攞番錢。
好多老番賓架嘅辦公室內，牆上掛上唔少大清帝國債券、中華民國債券，往往作為裝飾之用，其中一位重送過一幅畀左丁山！久唔久就會有人到銀行話：「我自大陸落嚟，珍藏阿爺八十年前嘅花旗銀行存款證，可唔可以兌現？」大家都唔識答，最佳答案就係叫佢去搵花旗銀行！
讀者林問：「本人快將移民三藩市唐人街，請問（一）邊間銀行好似滙豐恒生咁穩陣；（二）如何帶支票過去？」三藩市好似有滙豐分行，但我唔知喺邊度，唐人街就有一間加州最大銀行，全美三大銀行之一嘅「美國銀行」BankofAmerica嘅分行，據知好多東南亞華僑都喺呢度開戶口，地址係701GrantAve（都板街），如果讀者林移民去嗰度，啱晒。帶錢過去，好易啫，到銀行買張美元匯票（MoneyOrder）隨身帶埋過去，方便之至！