收到日本批發方面報料，PS2主機售價短期內會有輕微減幅，大約會減2,000至4,000日圓左右。不過香港行貨嘅售價，就未必會跟隨跌幅而下調，事關行貨PS2喺香港嘅售價，已經早喺上個月前減咗，相信價錢唔會有乜大變動。
至於喺遊戲方面，3月尾啲Game出到大家買唔切，但到咗4月份，PS2除咗隻《WinningEleven6》叫做係一線正Game之外，其他都係二、三線之作，無甚看頭。預計好多大作都會留喺暑假檔期推出，好似GC嗰邊，就啱啱公布咗一啲大作嘅發售日期，包括任天堂兩大王牌瑪利奧同薩爾達！
如果大家「機齡」都有番咁上下，應該記得SEGA以前出過一條VGACable，用嚟將部DC駁上電腦Mon玩，對應到嘅Game，畫面真係靚到嘩一聲！PS2上年亦推出過相似嘅接線，但係只可以供PS2LinusKit用，所以當時並冇遊戲可以對應呢條Cable。
不過最近PS2又有全新嘅「525p逐行掃描功能」顯示制式出現，而第一款對應嘅遊戲，就係近排人氣度極高嘅《鐵拳4》，坊間Game舖師傅有見及此，於是馬上出條相對應Cable出市場，試玩之下發現畫面效果明顯重靚過街機版，不過暫時只係得一隻GameSupport，第二隻將會係《劍豪2》。
文：打機鐵人