前日兒童節係鍾淑慧三十三歲生日，佢老公吳岱融專登為老婆喺尖東一間卡拉OK搞咗個生日派對。
前晚吳岱融約埋成班老友記同老婆慶祝，包括歐陽震華、崔加寶、陳奕詩、高飛、林韋辰同武術指導林迪安等。
不過，全場最矚目嘅竟然係林迪安個寶貝女旦旦。兩歲嘅旦旦，十分精靈，同鍾淑慧個四歲囝囝吳政樺成晚跳跳紮，一齊唱《超人的主題曲》助興，好鬼得意，而喺小政樺作主動下，二人重親熱到手拖手㖭！而「搖搖大王」林韋辰即場示範搖搖絕技，令各人拍爛手掌。
謝霆鋒前日喺台北出席反盜版大遊行，其間有一段漏網新聞，話說霆鋒喺遊行隊伍中，不時同老友陳奕迅同莫文蔚咬耳仔。
此時同門師妹容祖兒見到霆鋒密密斟，立即搞笑咁大力拍霆鋒膊頭，大大聲嗌：「反盜版！」而林曉培亦將反盜版貼紙遞畀霆鋒，跟住用國語講：「最後一張了！不要說我這個朋友對你不好！」
杜德偉（Alex）同呂方前晚做新城節目《今夜陽光燦爛》嘅嘉賓，Alex同呂方一見面就雞啄唔斷。呂方話：「Alex每次打電話畀我都會扮聲，識咗二十幾年都有扮過三十幾次，重扮過拉登同印度人，次次我都認唔出。」另外，據知Alex會接伏明霞棒，成為雪碧新一任代言人，同蕭亞軒合作拍廣告。
由哥倫比亞投資、張藝謀執導嘅電影《英雄》，主要演員有梁朝偉、張曼玉、李連杰同章子怡。
早排有一批《英雄》嘅劇照曝光，據台灣《壹週刊》報道，批相出咗嚟之後，哥倫比亞方面好緊張，即刻同套戲嘅導演以及一班工作人員簽咗啲條款，防止劇照再外洩，務求將《英雄》一片搞到神秘啲，吊吓觀眾癮。
呢個復活節假期嘅電影，除咗華仔主演嘅《衛斯理藍血人》叫做成績好啲，收六百幾萬之外，幾套港產片成績都差強人意，《戀愛行星》、《異度空間》同《想飛》都係收百幾萬。西片最好收嘅，係《冰河世紀》，有六百幾萬，而重新推出嘅《E.T.外星人》，亦收到四百幾萬，睇嚟今個復活節檔期嘅電影，應該冇一套過到一千萬。
台灣名嘴、王菲好友陶晶瑩（陶子）早排過咗檔，去咗東風台做節目主持，佢日前同台灣一份報紙有過節，結果陶子公開喺自己嘅節目度大數嗰份報紙。
而嗰份報紙亦不甘示弱，喺刊登陶子同一班藝人合照嗰陣，竟然將陶子個樣好似剪紙咁飛走咗，擺明唔妥陶子，咁樣開戰法，都可算十分罕見。