馬會大董榮智健禮拜二在中信海都訂咗位擺慶功宴，請馬圈朋友飲番杯，賀一賀佢隻「奧運精神」勝出打吡大賽。記得當年「奔騰」贏咗打吡之後，榮太子亦曾擺酒慶祝，八方都有去。
講起榮太子，佢兩奪打吡冠軍，威到盡。好多人以為佢好彩，其實唔係。點解佢啲馬咁叻？原因好簡單──就係買得多，一批一批咁買，放在外地養，然後再揀隻最正嘅運來香港跑，咁有乜法子唔贏？其他買幾隻馬嘅馬主，要贏馬當然要靠彩數。
在眾多馬主或者馬會董事之中，榮太子算係受馬迷歡迎嘅少數，八方在馬場經常見佢，或拉頭馬或上台頒獎，而佢一出現，啲馬迷多數鼓掌，同有啲人一蒲頭就被人噓有天淵之別。問資深賭仔點解？佢話：因為啲馬準囉！咁遲吓女皇盃國際賽，隻「奧運精神」又跑，睇吓榮大董有冇機會再攞威。
E-mail：