八方上月尾去光華聽一個講座時，身為講者之一嘅毓民話自己份身家唔見咗幾千萬，席間重顯得有點悲觀。
講座原本係討論「董建華能否帶領香港走出困局？」，四個講者，除咗毓民外，重有何秀蘭、嶺南大學嘅李彭廣同珠海書院嘅簡澤源，佢哋都睇死阿董唔能夠學摩西咁，帶領港人走出困境。
毓民係最悲觀嘅講者，佢一提到阿松唱《獅子山下》叫大家憶苦思甜時，就牙痛咁聲話最怕睇番轉頭，事關自己過去五年唔見咗成四、五千萬，「諗起就好想死！所以唔諗嘞！」佢又自嘲「我哋呢啲老嘢死晒，社會就會美麗到不得了，不過不幸醫學發達，有排未死得」。
毓民當時講到興起，連阿松都寸埋，八方見佢都好睇得開，重識得講笑，祝願佢早日跨過難關，克服困境。
E-mail：