曾憲梓一擲五百幾萬，捐嚟起嘅浙江大學曾憲梓教學大樓前日落成，曾老專程上杭州剪綵，重同老朋友前香港新華社副社長張浚生見面。張生好畀面，佢𠵱家係浙江大學黨委書記，但演講時不忘提自己打嘅呔都係捧曾老嘅金利來場。
雖然曾老捐幾百萬起大學好豪氣，但一講到使錢就好慳家。佢同浙大班學生講，要成功就要勤儉、誠信加智慧。曾老講到興起，重憶起當年自己幾咁慳，一家人成日嘅餸錢只有一蚊，但如果嗰日係曾老親自買餸，佢最多只捨得買八毫子，連兩毫子都慳得就慳！
八方睇到中新社嘅報道，浙大班學生聽曾老講創業秘笈聽到點晒頭，熱烈拍掌唔在講，重話有一個「勇敢的學生」衝破保安阻攔，為嘅就係攞偶像曾老簽名，都咪話唔誇張。睇嚟內地學生比香港啲細路更有前途，識得搵有錢佬做偶像，攞簽名。
（圖）曾憲梓捐錢起大學就豪氣，但一講使錢就好慳家。
E-mail：