用一千蚊就可以有份創世界紀錄？重可以做善事幫「無國界醫生」、「奧比斯」、「雁心會」同「薪火行動」？
冇錯，最近一個名為「匯心里程」嘅義工組織，正籌備在七月十四日於灣仔運動場，安排二千二百人同一時間玩「二人三足」，希望打破健力士世界紀錄。唔講唔知，對上一次最多人一齊玩二人三足，係由日本人喺二千年時所創，當時共有一千九百人參加。日本人出名團結，香港今次都唔可以輸畀人睇，二千二百人，每人籌一千蚊，咁就可以籌到二百二十萬畀「無國界醫生」等四個慈善組織。據講市民嘅反應都幾踴躍，不過經濟唔好，向大機構籌款時就難咗啲。
其實，𠵱家香港咁嘅時勢，玩二人三足真係特別有意義，雖然大家舉步維艱，但只要齊心同步，最後一定可以成功。八方知道主辦單位傾緊請董太出席，唔知阿董到時會唔會有興趣玩埋一份呢？
E-mail：