在香江已經歷過兩個「風雨十年」嘅光華新聞文化中心前主任江素惠，自從今年元旦無官一身輕後，逍遙快活咗三個月，最近終於不甘寂寞，再重出江湖。
八方噚日啱啱收到江小姐寄嚟嘅請柬，原來經過兩個幾月，佢已經籌備好成立一間新公司，叫做香江文化交流中心，打正招牌專責係建基香港搞兩岸三地文化交流，同原來嘅光華打對台。
江素惠嘅新公司已經擇定下禮拜一吉日開張，同場加開頭炮活動喺銅鑼灣中央圖書館舉行《兩岸三地中青藝術家油畫展》，重請咗已鐵定留任嘅律政司司長梁愛詩剪綵，其他主禮嘉賓重有中大副校長金耀基教授、藝發局主席何志平，同埋馬會行政總裁黃至剛。詩姐深得北京領導人寵信，又係特首身邊紅人；馬會又係全香港最受歡迎嘅「社團」，有佢兩個撐住，江小姐新公司梗會生意興隆啦！
不過，點解江小姐唔請佢嘅舊上司張良任做主禮嘉賓嘅？
（圖）有詩姐同黃至剛捧場，江素惠間新公司實做得起。
E-mail：