復活節在家睇HBO一套戲，夏里遜福主演，名為RandomHearts（台灣譯《懸情追蹤》，所有電影中文字幕都喺台灣做，故此影片中文名亦跟台灣）；套戲內容好簡單，主要係男主角嘅老婆與女主角嘅老公偷情，瞞住男女主角，點知飛機失事，雙方嘅老婆老公一齊死咗，先至穿咗出嚟，但報界唔知。
故事內容唔重要，令左丁山印象深刻嘅係女主角（國會議員，已在搞競選連任）與夏里遜福到邁阿密追尋原因，女主角要離開現場時，夏里遜福右手搭住佢膊頭，請佢行慢啲，點知俾一個選民撞正，影咗一幅相。呢幅相好快落喺女議員嘅競選對手手中，佢本來可以送畀報館，作大個古仔；譬如：「X議員在丈夫喪禮後與男士在邁阿密拍拖」諸如此類，肯定可以上小報頭版頭條，跟住各報跟進，好容易就爆埋女議員老公勾引華府警察（夏里遜福）老婆嘅醜聞，重唔大鑊？女議員死梗啦！
點知女議員對手非常慎重，竟然諗到：「你（女議員競選經理）裝定個局，搵人送張假照片畀我，我一做大嘅話，你就發表聲明否認，提供證據話我挖糞，侮辱女議員對丈夫嘅深厚感情，咁我咪死梗，實俾選民唾棄。」於是議員對手放棄呢張相片。嘩，諗到咁深、咁長，美國啲競選公關戰略真係得人驚，唔怪得克林頓以前咁信服謀士DickMorris，而呢位仁兄嘅大作《新君王論》係梁錦松愛讀嘅新書，你睇吓松哥啲民望幾掂！