小初上個星期講到，啟帆（646）因為公開招股部分超額，搞到要由配售股部分回撥，引致街貨太多難炒上，結果一如所料，上市第二日就跌穿50仙的招股價。不過，隻股噚日臨放假前大發神威，一抽就抽上27％，收56仙。
經紀陳話，本來啟帆成班幕後炒家一早摩拳擦掌，準備做一場好戲，點知突如其來的超額認購，搞亂咗個計劃，既然係咁，炒家就索性放軟手腳，任得搞亂檔者輸錢收場，嘔返批貨出嚟。
由於啟帆size夠細，所以好快趣就收返齊，加上同日上市的自然美（157）升勢凌厲，引起市場對新股的興趣，所以噚日即刻順勢炒上。經紀陳話睇個勢，加埋炒家手貨的成本，斷估重有一兩日貨仔炒吓，但就要識得落車。
另外，鈞濠（115）噚日亦勁升43％，收17.2仙，但經紀陳話，隻股早排先至玩過笨豬跳，由70仙插落10仙，人哋大把平貨在手，何苦幫人接貨。