美國證監加緊調查公司帳目，杜指隔晚挫逾百點。受此影響，港股一開市就插落10747，既然跌到心目中嘅入貨區，趙飛雲一於按照原定策略買貨。其實噚日個市依然好靜，恒指全日波幅得71點，收10831，微跌2點，成交多番些少，亦只係56億左右。
噚日朝排隊買貨，由於係第1注，只係在0.455元買咗5萬份和黃Call輪9110。另外，噚日推介嘅重慶鋼鐵（1053），亦喺1.12元買咗10萬股。至於倉內剩低嗰10萬股佑威（627），則依然揸住，股價先回可補貨，若先上80仙樓上，則睇勢食胡。
長假前揸多咗貨，風險都唔細。今晚美國公布就業數據，對短期後市會有頗大影響，必須昅住，中東局勢當然亦要留意，若見認真唔對路，就要有止蝕準備，具體策略下周一至講。
呢個禮拜嘅大市走勢，基本同預期一樣窄幅橫行，向上破唔到11108，向下再試10700水平亦守得住。照計美股杜指跌到落10198，距離10000至10100重要支持區不遠，再跌空間有限，如果假後盈富批貨去得晒，港股好有機會轉勢。